Ogni anno, il 2 luglio, ricorre ad Enna la festa della Madonna della Visitazione, Patrona della città. E’ una festa antica di secoli che ancora mantiene nell’animo degli ennesi il fervore religioso di sempre. La processione sfila per le vie tortuose dei quartieri antichi seguendo il percorso che venne indicato dal volo di due colombi. La processione parte dal Duomo e raggiunge la chiesa di Montesalvo dove la statua della Madonna sarà esposta per due settimane. Lunedì mattina i festeggiamenti sono annunciati dallo sparo di cento colpi di cannone che rintuonano in tutta la vallata e raggiungono i paesi vicini.
E la Navi d’oru va…
Centu corpa di cannuna
arriviglianu l’Ennisi
propriu oggi u dui dû misi
si festeggia la Patruna
Madunnuzza Matri ranni
quanta fudda pi la via
quantu genti a pedi ’nterra
câ preghiera Ti ringrazia
p’un miraculu ’na grazia
supplicati e ricivuti
pi ’na sufferenza amara
dâ persuna c’hai cchiù cara
quantu braccialetti e aneddi
appuntati nâ vistina
di ’sta Matri ’sta Bammina
di ’sta Stidda e occhi beddi
E la Navi d’oru va
’ncapu i spaddi traspurtata
di li Nudi ’nvesti bianca
di li banni accumpagnata
san Micheli e san Giuseppi
li stinnardi azzurri e bianchi
li carusi e i virgineddi
li rusarî e a litania
a lu gridu Viva Maria
pi li strati angusti e stritti
tapezzati ’i finisciuna
chini di coperti bianchi
di merlettu oppuri ’i sita
d’unni partunu a cannisci
rosi e sciuri ’mprofumati
chiovi amuri ’ncapu a vara
di la nostra Matri cara
ntê vaneddi li mascuna
palloncini colorati
picciriddi ’mbrazza ê matri
Un diadema tuttu d’oru
di smiraldi di rubini
di turchisi acquimarini
a timpesta di brillanti
rilucenti sfaviddanti
cu lu suli i stiddi a luna
pari fatta ’sta curuna
T’incurnicia a facci amata
si a Regina dî regini
Matri nostra ’mmaculata
E la Navi d’oru va
pi li strati ’i ’stu paisi
pi Tia Matri di l’Ennisi
tutta ’nfesta è la città
E chiancennu Ti pregamu
Tu ni guardi e ni surridi
ni riinchi u cori ’i fidi
di ducizza e d’umiltà
Ne lu celu li palummi
fannu voli d’allegria
disignannu un cori ranni
lu To’ cori o Maria
Geppina Macaluso
poesia tratta da “Comu acqua di surgiva”
Target Editrice Enna
